Rosen College of Hospitaliy Management, College of Medicine y College of Engineering and Computer Science di Universidad di Central Florida a ricibi 4.5 miyon di dollar como iniciativa di un investigacion destina pa alivia e daño causa na e sector di hospitalidad, biahe y negoshi chikito causa pa crisis di salud manera tabata e caso cu e pandemia di Covid-19.
Financiamento p’e proyecto di investigacion ta bini for di e programa di inversion strategico di UCF. E proyecto aki ta respalda vision di e presidente di UCF, Alexander N. Cartwright. Su vision ta cu lo converti e universidad den un “universidad pa futuro” como un di e institucion publico principal y e universidad publico principal pa investigacion metropolitano di mundo.
E iniciativa di salud pa biahe y enfermedad infeccioso tin enfoke riba tres area principal:
– Proporciona un sistema cu ta alerta cu anticipacion a traves di recompilacion di dato
– Trece e biahero y tur cu ta atende nan mas cerca di ciencia, asina ta cera e buraco cu tin entre ciencia basico y ciencia di comportacion
– Crea un recurso pa e negoshinan chikito y mediano cu tin den e area turistico, asina lo yuda nan maneha cualkier crisis di salud den futuro.
Professor Robertico Croes di Aruba ta e investigado principal di e iniciativa aki. El a concentra su investigacion riba e economia di turismo, desaroyo humano, pobresa y e negociacion di turismo cu interes special den economia chikito y desaroyo.
Croes a menciona cu e iniciativa tocante enfermedad infeccioso y salud durante biahe ta importante pa motibo di e impacto economico pa biahe rond di mundo y su capacidad pa alivia pobresa y eleva e desaroyo humano.
“Nos a cuminsa e proyecto aki durante e prome dianan di e pandemia”, Croes a indica. El a continua bisando cu: “E crisis di salud manera esun cu a caba di pasa, no ta algo iregular, cada bes nan ta mas frecuente. Tin biaha nan ta aisla den un cierto area di mundo, pero manera nos a wak cu COVID, nan ta destrui un fraccion di economia y e negoshinan chikito hopi biaha no por recupera pasobra nan no tin e recurso cu e companianan grandi ta conta cu ne pa por disminui e golpi di un crisis.” Trabou pa cu e iniciativa aki ta continua desde comienso di zomer.
TOCANTE DR. TICO CROES
Robertico Croes ta traha pa Rosen College of Hsopitality Management na University of Central Florida, na Merca. El a studia “Public International Law” na Universidad di Bogota, na Colombia. Djey el a sigui den “International Political Decision-Making” na University of Southern California na Los Angeles, na Merca. Y por ultimo a logra su Ph.D den “Applied Economics” na University of Twente na Hulanda.
Tico Croes a traha y despues a hasta bira director di Departamento di Relacionnan Exterior di Gobierno di Aruba. Entre 1989 y 1994 e tabata miembro di Parlamento di Aruba, entre 1994 y 1998 e tabata Minister di Asuntonan Economico y di Turismo di Aruba. Entre 1998 y 2001 e tabata Minister di Finansa y vice-Minister Presidente di nos pais. Y for di 2018 te cu awe e ta profesor na universidad na Merca.
